२०८२ मंसिर १३, शनिबार ०७:१६
जनता समाजवादी पार्टी नेपालले २८ बुँदे मागसहित संघर्षका कार्यक्रम सार्वजनिक गरेको छ ।
जसपा नेपालका अध्यक्ष उपेन्द्र यादवले दलित र महिलाहरूका लागि न्यायोचित प्रतिनिधित्व तथा सामाजिक न्यायको प्रत्याभूति गराउन उनीहरूका लागि छुट्टै आरक्षित निर्वाचन क्षेत्रको माग गरेका छन् । पूर्वउपप्रधानमन्त्रीसमेत रहेका अध्यक्ष यादवले सरकार समक्ष आफ्नो २८ बुँदे माग प्रस्तुत गर्दै उनले छुट्टै आरक्षित निर्वाचन क्षेत्रको माग गरे ।
जनसंख्याका आधारमा हुने प्रतिनिधित्व लोकतन्त्रको मूल आधार रहेको र समान जनसंख्याका आधारमा प्रतिनिधित्व हुनेगरी निर्वाचन क्षेत्र पुनः निर्धारण गरिनुपर्ने उनले बताए । संविधान संशोधन वा पुनर्लेखनको माग गर्दै राष्ट्रिय समास्याको तत्काल समाधान गरी मुलुकलाई निकास दिन समेत अध्यक्ष यादवले माग गरे ।
उनले उच्चस्तरीय आयोगको सुझाव प्रतिवेदनका आधारमा दश प्लस हुने गरी राज्यको पुनः पुनर्संरचना गर्नुपर्नेमा जोड दिएका छन् । संघीय प्रणालीको सिद्धान्तका आधारमा प्रदेशहरूलाई अधिकार सम्पन्न बनाउनुपर्ने माग गर्दै उनले प्रत्यक्ष निर्वाचित कार्यकारी राष्ट्रपति प्रणाली र पूर्ण समानुपातिक निर्वाचन प्रणाली लागू गर्नुपर्ने माग अघि सारेका छन् ।
स्थानीय तहलाई प्रादेशिक क्षेत्राधिकार अन्तर्गत राखिनुपर्ने बताउँदै उनले स्थानीय तहको निर्वाचन गैरदलीय आधारमा गर्नुपर्ने अडान राखेका छन् । जेन– जी पुस्ताले राखेको माग सरकारले तत्काल सम्बोधन गर्नुपर्ने भन्दै उनले सो आन्दोलनमा भएको हत्या, हिंसा, आगजनी विध्वंस जस्ता क्रियाकलापहरूको छानबिन गरी कसुर ठहरेकालाई कानुन बमोजिम कारबाही गरिनुपर्ने माग गरेका छन् ।
विगतका आन्दोलनका बेला गठन भएका न्यायिक छानबिन आयोगहरूको प्रतिवेदन समेत सार्वजनिक गर्न माग गर्दै अध्यक्ष यादवले प्रदेशमा प्रहरी तथा कर्मचारीहरूको समायोजन गरी प्रदेश कानुनको व्यवस्था गर्न माग गरे । उनले किसानहरूलाई सहुलियत दरमा कृषि ऋण, सिचाइँ, मल खाद, बिउ विजन, किट्नाषक औषधि र कृषि बजारको व्यवस्था गर्न पनि माग अघि सारेका छन् ।
